Azərbaycan çempionatının oyunları sükutla başlayıb, voleybolçular meydana qara sarğı ilə çıxıblar
07.02.2023 22:16 İdman

Azərbaycan çempionatının oyunları sükutla başlayıb, voleybolçular meydana qara sarğı ilə çıxıblar

Kişi voleybolçular arasında Azərbaycan Yüksək Liqasında V turun oyunları keçirilib.

"MediaPost"un məlumatına görə, Voleybol Mərkəzində təşkil olunan hər iki matç Türkiyədə baş vermiş zəlzələ nəticəsində həlak olanların xatirəsinin bir dəqiqəlik sükutla yad edilməsi ilə start götürüb. Həmçinin komandalar meydana qara sarğı ilə çıxıblar.

Günün ilk matçında “Murov” MOİK-lə üz-üzə gəlib. Matçın qalibi tay-brekdə müəyyənləşib. Birinci hissədə 25:23 hesabı ilə qalib gələn Eldar Əliyevin komandası növbəti setdə də üstün olub - 26:24. Üçüncü hissədə toparlanan “Murov” sonrakı iki setdə 25:15 hesabı ilə qalib gələrək tarazlığı bərpa edib - 2:2. Həlledici setdə 15:7 hesabı ilə üstün olan "Murov" görüşü öz xeyrinə başa vurub - 3:2 (23:25, 24:26, 25:15, 25:15, 15:7).

Turun növbəti qarşılaşması "Xarı bülbül" və "Neftçi" klubları arasında olub. Gərgin keçən ilk seti "Neftçi" iki xal fərqi ilə öz xeyrinə tamamlayıb - 25:23. Bundan sonra təşəbbüsə yiyələnən "Xarı bülbül" ikinci hissədə qələbə qazanaraq (25:13) ümumi hesabı bərabərləşdirib - 1:1. Sonrakı setlərdə isə "Neftçi" rəqibini 25:14 və 25:23 hesabları ilə üstələyərək meydandan qalib ayrılıb - 3:1 (25:23, 13:25, 25:14, 25:23) .

Beləliklə, V turdan sonra “Murov” 14 xalla liderliyini davam etdirir. 9 xala malik “Xarı bülbül” ikinci, 6 xalı olan “Neftçi” üçüncü yerdə qərarlaşıb. Bu gün ilk xalını qazanan MOİK isə sonuncu pillədir.

Xəbərlər departamenti

Gündəm