BMT: Dünyada ərzaq məhsullarının qiyməti bahalaşır
06.08.2020 22:12 İqtisadiyyat

BMT: Dünyada ərzaq məhsullarının qiyməti bahalaşır

Dünyada ardıcıl olaraq ikinci aydır ki, ərzaq məhsullarının qiyməti qalxır. İlk növbədə, bitki yağları və süd məhsulları bahalaşır.

“MediaPost” xəbər verir ki, bu barədə BMT-nin Ərzaq və Kənd Təsərrüfatı Təşkilatı məlumat yayıb.

Məlumatda qeyd olunub ki, ərzaq məhsulları qiymətlərinin orta indeksi iyulda 94,2 punkt təşkil edib. Bu da iyun ayı ilə müqayisədə 1,2 faiz çoxdur.

Təşkilatın saytında dərc olunan məruzəyə əsasən, bitki yağının qiymət indeksi ötən ayla müqayisədə 7,6 faiz bahalaşaraq, son beş ayda ən yüksək göstəriciyə çatıb. “Əsas bitki yağı növlərinin qiymətinin bahalaşması istehsalat həcminin azalması üzrə proqnozlar, həmçinin beynəlxalq idxal tələbatının aktivləşməsi və işçi çatışmazlığı ilə bağlıdır”, - deyə sənəddə bildirilir.

Ötən ay süd məhsullarının indeks göstəricisində də 3,5 faizlik artım müşahidə olunub. Bahalaşma kərə yağından pendirə və quru südə qədər bütün məhsullara təsir edib.

Bununla yanaşı, dənli bitkilərin qiymət indeksləri iyun ayı ilə müqayisədə demək olar ki, dəyişməyib. İyul ayında ətin qiymət indeksində isə azalma müşahidə edilib – ötən ayla müqayisədə 1,8 faiz. Axar.az

“MediaPost”

Xəbərlər şöbəsi

Gündəm