Cozef Bayden: "Səslərin hesablanmasının dayandırılmasına imkan verməyəcəm"
07.11.2020 13:18 Dünya

Cozef Bayden: "Səslərin hesablanmasının dayandırılmasına imkan verməyəcəm"

ABŞ prezidenti postuna demokratların namizədi Cozef Bayden seçkilərdə qalib gələcəyinə əmin olduğunu bəyan edib.

"MediaPost" CNN telekanalına istinadla xəbər verir ki, Cozef Bayden 74 milyon seçicinin səsini qazandığını və bunun Birləşmiş Ştatlar tarixində ən yüksək nəticə olduğunu deyib.

“Rəqəmlər hər şeyi göstərir: biz seçkilərdə qələbə qazanırıq. Arizonada, Nevadada qalib gəlirik. Nevada ştatında üstünlüyümüz iki dəfə artıb. 300-dən çox seçkiçi səsi ilə qələbə qazanmağa hazırlaşırıq”, - deyə o bildirib. Tərəfdarlarını sakitliyi qoruyub saxlamağa çağıran Bayden əlavə edib ki, səslərin hesablanmasının dayandırılmasına imkan verməyəcək.

Qeyd edək ki, noyabrın 3-də Birləşmiş Ştatlarda prezident seçkiləri keçirilib. Amma hələlik qalib müəyyən olunmayıb. Bir sıra ştatlarda səslərin sayılması davam edir. ABŞ-ın aparıcı telekanallarının hesablamasına görə, Bayden 264 seçkiçi səsi ilə (qalib gəlmək üçün altı səs qalır) liderlik edir, hazırkı prezident Donald Tramp isə 214 səs yığıb.

Xəbərlər departamenti

Gündəm