Ermənistanın təcavüzünə dair İƏT-in Təmas Qrupunun üzvləri Azərbaycana səfər edəcək
05.04.2021 18:25 Siyasət

Ermənistanın təcavüzünə dair İƏT-in Təmas Qrupunun üzvləri Azərbaycana səfər edəcək

Ermənistanın Azərbaycana qarşı təcavüzünə dair İslam Əməkdaşlıq Təşkilatının Təmas Qrupunun üzvləri Azərbaycana səfər edəcəklər.

"MediaPost"un xəbərinə görə, səfər sabah baş tutacaq.

Təmas Qrupunun üzvlərinin Gəncəyə və işğaldan azad edilmiş ərazilərə səfəri də planlaşdırılır.

Qeyd edək ki, 2016-cı ilin aprel ayında “Ədalət və sülh naminə birlik və həmrəylik” şüarı altında İstanbul şəhərində keçirilmiş 13-cü İslam Zirvə Görüşündə Azərbaycan Respublikasının Prezidenti İlham Əliyevin başçılıq etdiyi nümayəndə heyəti iştirak edib. Tədbirin Yekun Kommünikesində Ermənistanın ölkəmizə qarşı təcavüzü, 2016-cı ilin aprel ayının əvvəlində işğalçı ölkə tərəfindən gərginliyin qəsdən artırılması, habelə “Ermənistan Respublikasının Azərbaycan Respublikasına qarşı Təcavüzünə dair İƏT Təmas Qrupu”nun yaradılması haqqında təfərrüatlı bəndlər (16-cı və 17-ci bəndlər) yer alıb. Təmas Qrupuna 8 ölkə daxildir (Türkiyə Respublikası, Mərakeş Krallığı, Səudiyyə Ərəbistanı Krallığı, Pakistan İslam Respublikası, Malayziya, Qambiya İslam Respublikası, Cibuti Respublikası, Somali Respublikası).

Xəbərlər şöbəsi

Gündəm