Niyə subaylara “evli”, gənclərə “pensiyaçı” SMS-i gəlir? - Nazirlikdən açıqlama
29.04.2020 21:02 Cəmiyyət

Niyə subaylara “evli”, gənclərə “pensiyaçı” SMS-i gəlir? - Nazirlikdən açıqlama

Əmək və Əhalinin Sosial Müdafiəsi Nazirliyi 190 manatlıq birdəfəlik ödəmə üçün müraciət edən subay şəxslərə həyat yoldaşlarının mülkə və ya nəqliyyat vasitəsinə sahib olması ilə bağlı imtina cavabının verilməsi ilə bağlı açıqlama yayıb.

Qurumun İctimaiyyətlə Əlaqələr və Kommunikasiya Şöbəsinin rəhbəri Fazil Talıbov bildirib ki, həmin şəxslər onlara gələn cavab mesajını təhrif edərək paylaşırlar:

“Bəzi subay şəxslər sosial şəbəkə səhifələrində birdəfəlik ödəmədən imtina barədə onlara gələn SMS-dəki “həyat yoldaşının adına 2 və daha artıq daşınmaz əmlak və ya avtomobil olduğu” qeydini konteksdən çıxararaq müzakirə obyektinə çevirirlər. Əslində həmin şəxslərə mesaj mətnində “özünüzün və ya ərinizin (arvadınızın) adına” sözləri yazılıb. Yəni şəxs subay olduqda mesaj onun birbaşa özünə aid olub, ona məxsus əmlakı nəzərdə tutur”.

Xatırladaq ki, birdəfəlik ödəmə üçün müraciət edən gənclərə imtina səbəbi kimi pensiya almaları, bəzi subay şəxslərə isə həyat yoldaşlarının adında pay torpağı, mülk və ya nəqliyyat vasitələrinin olduğu göstərilib.

"MediaPost" xəbər verir ki, F. Talıbov “Qafqazinfo”ya açıqlamasında gənc şəxslərə pensiya almaları ilə bağlı gələn SMS cavablarına da münasibət bildirib:

“Vətəndaşlar üç növ pensiya ala bilər: yaşa görə, ailə başçısını itirməyə görə, əlilliyə görə. İstənilən yaşda olan vətəndaş pensiya ala bilər. Əgər ona yaşa görə pensiya düşmürsə, digər iki kateqoriya üzrə pensiya düşə bilir. Pensiya alması ilə bağlı SMS gələn gənclər də çox yaxşı bilir ki, ailə başçısını itirməyə görə əmək pensiyası alan vətəndaşlardır, sadəcə ifadəni bilmirlər, ya özlərini bilməzliyə qoyurlar. Bir sözlə, gənclərin pensiya alması ilə bağlı SMS-in gəlməsində heç bir qeyri-adi hal yoxdur. Ata rəhmətə gedirsə, işlədiyi vaxt ərzində yığdığı kapital ailənin gənc üzvünə aylıq əsaslarla ödənilir. Bəzən mətbuat orqanları da sosial şəbəkədə yazılanların toruna düşür”.

Xəbərlər departamenti

Gündəm