SOCAR və GOGC qazın nəqli və saxlama infrastrukturunu genişləndirə bilər
28.11.2022 17:34 Energetika

SOCAR və GOGC qazın nəqli və saxlama infrastrukturunu genişləndirə bilər

Azərbaycan Dövlət Neft Şirkəti (SOCAR) və Gürcüstan Neft və Qaz Korporasiyası (GOGC) arasında qazın nəqli, saxlama infrastrukturunun genişləndirilməsi və digər istiqamətlərdə əməkdaşlıq perspektivləri müzakirə edilib.

MediaPost  SOCAR-a istinadən  xəbər verir ki, bu barədə SOCAR prezidenti Rövşən Nəcəfin bu gün GOGC-un baş direktoru Corci Çikovani ilə keçirdiyi görüşdə bildirilib.

Görüşdə Azərbaycan ilə Gürcüstan arasında strateji tərəfdaşlıq əlaqələrinin iqtisadiyyatın bütün sahələrində, o cümlədən enerji sektorunda uğurla inkişaf etdiyi vurğulanıb, birgə həyata keçirilən irimiqyaslı enerji və nəqliyyat layihələrinin əhəmiyyətindən bəhs edilib.

Görüş çərçivəsində Gürcüstanın ən böyük investorlarından olan SOCAR-ın bu ölkədəki çoxşaxəli fəaliyyətindən danışılıb, bu istiqamətdə neft və neft-kimya məhsullarının ticarəti, nəqli, habelə təbii qazın təchizatı və paylanması kimi əməliyyatların uğurla icra edildiyi bildirilib.

Həmçinin, tərəflər arasında qarşılıqlı maraq doğuran müxtəlif mövzular ətrafında fikir mübadiləsi aparılıb.

Xəbərlər departamenti

Gündəm